SUMENEP, MaduraPost – Lora BPRS Bhakti Sumekar, H. Hairil Fajar, barenteng ngonjuk sajja, ekhlas aladine magarsare Songennep kalaban genna’ majaga kantor BPRS neng e man-ka’dhimman kacamadan se badha neng e Kabupaten paleng temor Polo Madura.
Ta’ guna neng e darat, neng e sabban-sabban polo, kadiya neng e Podhay, Kangean, Sapeken, Masalembu, Gili Genteng, Talango tor Polo Paterran, panjenengngan pasthe bakal ngoladi badhana kantor BPRS Bhakti Sumekar manjeng sodek tor parjuga.
Tareka enggapaneka, ca’epon Lora H. Fajar, ta’ laen kaangguy ngonjuk darajat pangoreban magarsare Songennep, khusussepon, tor bangsa Madura Indonesia sadajana.
“Pojhi salamet ngaèmodhi ngadhegghâ Naghârâ Songennep sè kapèng pèttong atos saèket lèma’ (755). Malar mandhâr Songennep dhâddhiyâ kottha sè pènonjhul, ngadhek soghâ’ parjhughâ, jhâjâ tor rajjhâ salanjhângnga,” ḍhâbuna Lora H. Fajar, neng è status WhatsApp-epon, kalaban eja’an Basa Madura asel konsinyasi Balai Bahasa Jaba Temor 2008-2011, Kemmès 31 Oktober 2024.
Are samangken, ca’epon salerana majarna’ jajarba’an, lerres juntrong neng e Jumenneng Are Maddek Sodegga Nagara Songennep, sajja tor neyat dhalem dhadhana, atamba rabak ka’angguy nambain pangabakte dha’ magarsare Songennep.
“Bhâdhân kaulâ kodhu amasthèyaghi sadhâjâ maghârsarè Songennep, saè sè bâḍâ neng è dhârât otabâ è polo, ghâmpang nyèmpen obâng, ngènjhâm, tor kaparlowan laènna neng è BPRS, nyopprè ma’morra kaodi’ânnèpon,” ca’èpon salèrana.
Ta’ coma caca, ikhtiyarrepon Lora BPRS Bhakti Sumekar atandha bukte nyata. Ngabidi taon 2021 kantos samangken, somakta ekonomi Kabupaten Sumenep terros ongga gan sadindak. Taon 2021, ekonomi Sumenep tombu 4,5%, terros ongga 5,2% persen e taon 2022, kantos daddi 5,7% e taon salastarena, 2023.
Adhasar panyangka becce’, ngoladi kabadhaan se ampon kalampan, ekonomi Sumenep bakal tamba ongga, nodduk angka 6% neng e akher taon 2024.
“Kalabân inovasi-inovasi BPRS sè ampon tor bhâkal kalampan, nyopprèya ongghu mèghunanè kaangghuy kajhâjâ’ân tor kabhâjjrâ’ân maghârsarè Songennep sadhâjâna,” dhâbuna.
Inovasi kasebbhut aropa pan-saponapan program unggulan, kadiya program Tabungan Simpel khusus ngangodhadan (morèd), Pick Up Tabungan, Night Banking, Tabungan Kurban, tor tabungan laèn samacemma kadiya tabungan khusus kaangguy ponggaba disa, UMKM, tor laènna.
Salaen gapaneka, ca’epon Direktur Hairil Fajar, ponggaba BPRS Bhakti Sumekar jugan kerrep mabadha lalampan edukasi finansial ka’angguy magarsare Songennep, otamaepon ngangodhadan.
“Tarèka èngghâpanèka, sè aropa literasi keuangan, nyopprè pangaonèngan ngèngèngè carana maghârsarè ngator obâng, bisa terros atambâ bhâghus tor ongghu-ongghu mèghunanè dâ’ bhângsa,” totok jajarba’annepon salerana H. Fajar.***
